थे वगत गमायो सारो

फोकट री वातं कर करने,
थें वगत गमायो सारो।
वगत गमायो सारो रे,
थे खोयो मनख जमारो ।।
घरां – घरां मे फरतो रेवे,
करे है थारी – मारी,
बैठा – बैठा वातं फांके,
दुनियां री सारी ।
क्यूं बान्ध्यो करम रो भारो रे,
थे वगत गमायो सारो ।।
पगा रे नीचे बळतो नीं दीखे,
डूंगर दीखे बळतो,
दुख पराया ऊं दुबलो पडग्यो,
रेग्यो हलतो – गळतो।
थारे मन में भरम अंधारो रे,
थे खोयो मनख जमारो ।।
पराया घर रा करे न्यावटा,
नहीं खबर खुद रे घर री,
टुकड़ा पराया खातो रेवे,
चाय पीवे फोकट री।
थारे माथे काल पसारो रे,
थे खोयो मनख जमारो ।।
गुरां – पीरां को शरणो ले ले,
खोले ज्ञान री खड़की,
केवे नारायण पटेल निरालो,
पीले राम रस गटकी ।
थारो सुधर जावे भवसारो रे,
थे खोयो मनख जमारो ।।

कातो नाक तोई दूणो बड़े

नकटा रे कई इज्जत बगड़े,
काटो नाक तोई दूणो बड़े।
बोले घणो यो मीठो-मीठो,
संग रेवे बण ढ़ीटो-ढ़ीटो।
यो पाळयो गण्डक पीण्डी पकड़े।
काटो नाक तोई दूणी बड़े।।
दगा बाज यो दूणो रे नमजा,
गरज पड़िया यो पगा में पड़जा।
यो पछे घमण्ड में घणो अकड़े,
काटो नाक तोई दूणो बड़े।।
नीं है अणी के कण-कायदो,
अकल देवा सूं कई है फायदो।
अळया-गळया में भरे हापटा,
लोग लगावे खेंच झापटा।।
लोग पटक धूळा में घणो रगड़े,
काड़े है यो घर रा दिवाळा,
अस्याऊं दूरो थूं रिजे निराळा।
गळा में जाईने यूं रगड़े,
काटो नाक तोई दूणो बड़े।।

थूं तो रेग्यो डेळ - डपोळ

घर रो रियो नीं घाट रो,
थूं वेग्यो डामाडोळ।
थूं वेग्यो डामाडोळ।
दन ऊगो न आयो तावड़ो,
सूतो कांई फटोळ।
तरी-तरी तो लोग खायग्या,
रेई ग्यो लारे जोळ ।।
घुस्या गण्डकड़ा घर में थारे,
खुली राखी पोळ।
दही – दूध वटाळ दीदो,
घी को दूनो ढोळ।।
आया मांगवा वाळा आंगणे,
लाम्बी लागी ओळ।
लीदो जणीको पाछो न दीदो,
कर दियो हळाबोळ।।
डेळ मति रे डूंगा थूं तो,
झटपट भरले खोळ।
नारायण निराळो केवे,
मनख जनम अनमोल।।
थूं तो रेग्यो डेळ – डपोळ ।