आपाणो राजस्थान - समाचार

नई दिल्ली: भारत अर रूस रै बीच री दोस्ती अबे 'ध्रुव तारा' रे ज्यूँ मज़बूत अर अटल बणगी है, जिकी दुनिया रै सगळा देसां सारू एक मिसाल है। राष्ट्रपति व्लादिमीर पुतिन रै हाल ही में भारत दौरा माथै कैई मोटा अर अहम समझौता हुया, जिण सूं दोनूं देसां रा संबंध औरां ईं गहरा हुया है। प्रधानमंत्री नरेन्द्र मोदी अर राष्ट्रपति पुतिन रै बीच ईं मुलाकात में 'खास अर विशेषाधिकार प्राप्त रणनीतिक साझेदारी' ने और मजबूत करण माथै बात व्‍ही। दोनूं देसां बीच रक्षा रै क्षेत्र में कैई बड़ा समझौता व्‍हीया है। ईंणसूं भारत री सैन्य ताक़त बढ़ैला। रूस भारत रो सबसूं बड़ो हथियार आपूर्तिकर्ता (सप्लाई करण वाळो) है। परमाणु ऊर्जा (न्यूक्लियर एनर्जी), तेल अर गैस अर अंतरिक्ष तकनीक रै क्षेत्र में सहयोग बढ़ावण माथै सहमति बणी। दोनूं देस अंतर्राष्ट्रीय मंच, खास कर'र संयुक्त राष्ट्र (UN) में एक दूजा रो समर्थन करण री बात दोहराई। दोनूं ने आपसी व्यापार ने बढ़ावण अर निवेश (इन्वेस्टमेंट) सारू आसान वातावरण बणावण माथै भी जोर दियो। राष्ट्रपति पुतिन रो ईं दौरौ ईं बात ने साबित करै है कै विपरीत हालात में ईं भारत अर रूस री दोस्ती हर कसौटी माथै खरी उतरी है अर भविष्या में ईं ईं अटूट बणी रैवेला।

जयपुर: प्रदेश रा शिक्षा मंत्री श्री मदन दिलावर एक बड्डो अर इनोवेटिव (नवोन्मेषी) फैसलो लेवतां, राजस्थान रा सगळा सरकारी स्कूल रा बच्चां ने सप्ताह में एक दिन स्कूल यूनिफॉर्म (वर्दी) सूं छूट दे दी है। ईं संबंध में आदेस जारी कर दियो गयो है, जिकी पूरो लागू 1 अप्रैल सूं हो जावैला। शिक्षा मंत्री जी री घोषणानुसार: सप्ताह में एक दिन, स्कूल रा छात्र-छात्रावां सामान्य वेशभूषा में स्कूल आ सकैला। शिक्षा मंत्री जी खास कर'र ईं बात माथै जोर दियो कै, "वो कपड़ा लोकल बण्या होवै अर उणने पै'र'र आवै तो ओजू ईं चोखो है।" ईं सूं स्थानीय उद्योगां ने बढ़ावा मिलैला। ईं छूट रो मुख्य मकसद बच्चां ने अपनी संस्कृति सूं जोड़णो अर स्कूल में एक अलग महौल बणावणो है। ईं फैसला सूं बच्चां ने यूनिफॉर्म रै बोझ सूं थोड़ी राहत मिलैला, साथे ईं आत्मनिर्भर भारत अर लोकल सारू वोकल री भावना ने स्कूली स्तर माथै ईं मजबूत करी जावैला।

राजस्थान री धरती पर जनमी अर पली-बढ़ी किसान परिवार री बेटी श्रीमती ललिता नेहरा कठिन संघर्षां अर निजी चुनौतीयां नै हराइ न सौंदर्य प्रतियोगिता “मिसेज राजस्थान” में उपविजेता रो किताब हासिल करन नवो इतिहास रच्यो छै। ललिता नेहरा रो जन्म एक सामान्य ग्रामीण किसान परिवार में होयो। बीएससी पूरी करतै–करतै 19 साल री उम्र में वांरी शादी होगी। बियाह पछे वा रूढ़िवादी पारिवारिक परंपरावां, घरेलू जिम्मेदारियां अर घूंघटां री मर्यादा में ईं सीमित रह्यी। इण बीच वणी गंभीर बीमारी रो सामनो भी करयौ, जिकै कारण वा शारीरिक अर मानसिक रूप सूं कमजोर होगी। पण हिम्मत हारण री बजाय ललिता नेहरा संघर्षां नै चुनौती मानर आपणे बचपण रो सपनो — रैंप पर चालण रो — फैर जीवतो किधो। वणी कठोर योग, नियंत्रित डाइट अर दवाइयां रो नियमित अनुशासन अपनायो अर कुछ ही महिनां में फेर सूं स्वस्थ होवण रा मारग पर आगी। कठिन परिस्थितियां रे बावजूद ललिता खुद नै सिर्फ घर-परिवार रा काम तक सीमित नीं राख्यो, बल्कि आपणा सपनां नै पंखा लगाय। परिणाम सरुप मिसेज राजस्थान कार्यक्रम में ललिता नेहरा उत्कृष्ट प्रस्तुति करकैं उपविजेता रो किताब जीत ल्यो। इण उपलब्धि सूं ललिता आज देश भर री उण लाखां छोरियां वास्ते प्रेरणा बण चुकी छै, जिकै सामाजिक या पारिवारिक बंधणां कारण अपणा सपनां नै बीच में छोड़ देवे छै। ललिता नेहरा कहे छे — परिस्थितियां मुश्किल ही, पण हौसला नै मजबूत राख्यो। अगर रुका नी, तो मंजिल जरूर मिलै।

काशी/वाराणसी। भारतीय वैदिक परंपरा खातर गर्व रो विषय बनतां, महाराष्ट्र रो 19 बरस रो युवा वैदिक साधक देवव्रत महेश रेखे पवित्र काशी धरती पर ऐतिहासिक उपलब्धि दर्ज करीनै 200 बरस बाद दंडक्रम पारायणम् पूर्ण कर 'वेदमूर्ति' पदवी प्राप्त कर ली है। शुक्ल यजुर्वेद री माध्यंदिनी शाखा रा करीब 2000 मंत्रां रो अत्यंत कठिन दंडक्रम पारायणम् लगातार 50 दिनां तक बिना कोई त्रुटि अणे व्यवधान सफलतापूर्वक पूर्ण करियो है। दंडक्रम पारायणम् वैदिक पाठ री सबसूं जटिल, दुर्लभ अणे सर्वोच्च विधि मान्य है, जां मंत्रां ने विविध क्रमां मां बार-बार अणे त्रुटिरहित ढंग सूं उच्चारित करबो पड़ै है। युवा साधक देवव्रत महेश रेखे रो ई आध्यात्मिक पराक्रम सम्पूर्ण वैदिक जगत, भारतीय संस्कृति अणे युवा पीढ़ी खातर प्रेरणादायी मिसाल है। पूर्णाहुति 30 नवंबर ने वाराणसी रै रामघाट स्थित वल्लभराम शालिग्राम सांगवेद विद्यालय में संपन्न व्‍ही, जठै देवव्रत अध्ययनरत है। उपस्थिति विद्वानां, आचार्यां अणे शंकराचार्यां रा सान्निध्य मां ‘वेदमूर्ति’ री मानद उपाधि अर्पित कराई गाई। प्रधानमंत्री नरेंद्र मोदी सोशल मीडिया प्लेटफॉर्म ‘एक्स’ पर लिख्यो — 19 साल रो वेदमूर्ति देवव्रत महेश रेखे जिको करियो है, आवा वाळी पीढ़ियां याद राखसी। भारतीय संस्कृति सूं प्रेम करणा रा हर व्यक्ति खातर ओ गौरव रो विषय है। उत्तर प्रदेश रो मुख्यमंत्री योगी आदित्यनाथ भी देवव्रत ने शुभकामना प्रेषित करता लिख्यो कि आ उपलब्धि आवती पीढ़ियां खातर प्रेरणा रो प्रकाशस्तंभ है। वल्लभराम शालिग्राम सांगवेद विद्यालय री ओर सूं बतायो गयो कि - देवव्रत महेश रेखे रो तप, अनुशासन अणे समर्पण वैदिक अध्ययन रो सर्वोच्च आदर्श प्रस्तुत करै है। ई ऐतिहासिक उपलब्धि वैदिक परंपरा री जीवंतता अणे वैश्विक प्रभाव ने पुनः सिद्ध करै है। देवव्रत महेश रेखे रो यो अतुलनीय अध्यात्मिक पुरुषार्थ आधुनिक समय मां भी आपाणी वैदिक परंपरा, भारत रा ज्ञान-विज्ञान अणे सांस्कृतिक गौरव ने अखंड रूप सै स्थापित करै है।

केंद्रीय कृषि मंत्री शिवराज सिंह चौहान ईं बात रो ऐलान करियो है कै सरकार रजिस्टर हुया किसानां सूं तुअर (अरहर), उड़द अर मसूर री सौ टका (100%) खरीद एमएसपी (MSP) माथै पक्की करेला। जो राजस्थान राज्य सरकारां दाळां री खरीद कम करे या नीं करे, तो भी केंद्र सरकार नैफेड (NAFED) अर एनसीसीएफ (NCCF) जकी आपणी एजेंसियां रै ज़रिये सीधे किसानां सूं खरीद करेला। ईं कदम रो खास मकसद यो है कै किसानां नै उणां री ऊपज रो पूरो फ़ायदो मिळै अर बाज़ार रा भावां में अनाप-शनाप उतार-चढ़ाव सूं छूटकारो मिळै। यो फ़ैसला दाळ रै उत्पादन में देस नै आतम-निरभर बणावण री दिसा में एक मोटो पग है। कृषि मंत्री दोहरायो कै केंद्र सरकार स्वामीनाथन आयोग री सिफ़ारिसां नै पूरो मान’र, किसानां री लागत माथै 50 फीसदी मुनाफ़ो दे’र एमएसपी तय करण रो फ़ैसला 2019 में लियो हो अर वाँ रो पालन हो रियो है। सरकार हाल ही में विपणन मौसम 2026-27 सारू घणी रबी फ़सळां री एमएसपी में ऐतिहासिक बढ़त करी है, जिणसूं किसानां नै उणां री ऊपज रा चोखा दाम मिळ सकै।

जोधपुर। 'माणक अलंकरण 2025' अर दूजा पाँच विशिष्ट पुरस्कारां खातर, खोजपूर्ण, तथ्यात्मक, रचनात्मक समाचारां अर खास रिपोर्टिंग रै मार्फ़त ऊँच-दरजै री पत्रकारिता करता थका राजस्थान री सेवा करण वाळा पत्रकारां, जनसंपर्क कर्मियां, छायाकारां/कार्टूनिस्टां, इलेक्ट्रॉनिक मीडिया सूं जुड़्यी प्रतिभावाँ री प्रविष्टियाँ बुलाई गी है। ईं रै अलावा, एक विशिष्ट पुरस्कार (राजस्थानी लेखन री महिला साहित्यकार) खातर भी प्रविष्टियाँ आमंतरीत करी गी है। प्रविष्टियाँ 9 दिसम्पर 2025 तक 'माणक अलंकरण चयन समिति, माणक दैनिक जलतेदीप, मानजी को हत्था, पावटा, जोधपुर-342006' माथे पूगणी जरूरी है। 'माणक अलंकरण 2025' सूं सम्मानित करीजण वाळा पत्रकार अर विशिष्ट पुरस्कारां सारू चुणीयिड़ी प्रतिभावाँ रा नाँव री घोषणा स्व. माणक मेहता री 50वीं पूण्यतिथि 12 दिसम्पर 2025 नै एक 'आत्मीय गोष्ठी' में चयन समिति रै निर्णय मुजब करी जावैला। माणक अलंकरण 2025 अर विशिष्ट पुरस्कारां खातर दिसम्पर 2024 सूं नवम्बर 2025 तक री अवधी में छप्या समाचार, रिपोर्टाज, छायाचित्र/कार्टून, राजस्थानी लेखन (महिला) आदि रो जिकर कटिंग/छाया प्रतियाँ अर इलेक्ट्रॉनिक मीडिया कवरेज री सीडी रै साथै भेजणो जरूरी है। राजस्थान रा पत्रकारां नै खोजपूर्ण अर ऊँची पत्रकारिता खातर हिम्मत देण रै मकसद सूं दैनिक जलतेदीप रा संस्थापक स्व. माणक मेहता री याद में 'माणक अलंकरण' सूं हर साल एक होशियार पत्रकार नै सम्मानित करीजै है। ईं रै अलावा जनसंपर्क कर्मियां, कार्टूनिस्ट/छायाकार, इलेक्ट्रॉनिक मीडिया अर राजस्थानी लेखन (महिला साहित्यकार) सूं जुड़्यी प्रतिभावाँ खातर विशिष्ट पुरस्कार चुण'र उणां नै सम्मानित करीजै है। ईं पुरस्कार रै तहत चुणीयिड़ा पत्रकार नै रु.21,000/- (इक्कीस हजार) री पुरस्कार राशी, श्रीफल, शॉल अर प्रशस्ति-पत्र दे'र सम्मानित करीजै, जणांकै हर विशिष्ट पुरस्कार रै तहत रु.7,100/- (सात हजार सौ) री पुरस्कार राशी, श्रीफल, शॉल अर प्रशस्ति-पत्र दियो जावै है। बतावणी जोग है कै साल 1981 में स्थापी 'माणक अलंकरण' सूं अब तांई प्रदेश रा 43 पत्रकार सम्मानित हो चुक्या है। ईं सम्मान नै दैनिक जलतेदीप रै स्थापना दिवस 2 अक्टूबर (अथवा बदळ्यी तारीख) माथे दियो जावै है।

मूंडवा - अखिल भारतीय राजस्थानी भाषा मान्यता संघर्ष समिति रा संथापक लछमण दान कविया प्रदेश रा पच्चीसां सांन्सिदां ने मायड़ भाषा राजस्थानी सारू फरज निभावण रो आगरो करयो है। कविया प्रदेश रा पच्चीसां सांन्सिदां ने लिख्या ग्यापनां में लिख्यो है कै राजस्थानी भाषा विस्व री पच्चीसवीं अर देस री तीसरी सबसूं मोटी साहित्यिक भासा है। आजादी सूं पैली राजपूताणा री रियासतां में काम-काज री भासा ईं राजस्थानी रैयी है। आजादी रै पछै ईं राजस्थानी री कानूनी मान्यता री मांग गांधीजी री विचारधारा रै साथै चालती आई है। ईं प्रदेश में ईं बात रो दुख है कै अठै री जनता अर राजनेतिक नेता दोनूं ईं मायड़ भासा सारू उदास हैं, जिकै सूं राजस्थानी री पैचाण दिनानुदिन कम होवती जा री है। भासावां री मान्यता रा मापदंड अठै ठीक कोनी, जिकै कारण राजस्थानी भासा ने हर क्षेत्र में पिछड़ी भासावां री राजनीतिक कारणां सूं संबैधानिक मान्यता दे दी गी है। राजस्थान प्रदेश री जनता मन सूं बडी है अर हिन्दी ने राष्ट्रभासा बणावण रै मारग में ओळी निभाण सारू आपणी मायड़ भासा रो बडौ बलिदान दियो। आजादी रै तुरंत पछै प्रदेशवासी नेतावां हिन्दी भासा ने प्रदेश री राजभासा बणावण में लाग्या रैया। अब टैम आ गयो है कै प्रदेश रा पच्चीस ईं सांन्सिद मायड़ भाषा सारू आपणी ओळी निभावतां संसद रै सीतकालीन सत्र में राजस्थानी भाषा ने संबैधानिक मान्यता दिलवावण री पुरजोर मांग उठावण रो श्रेय अर प्रेय काम कराओ।

पांचवें पोकरमल राजरानी गोयल स्मृति राजस्थानी कथा साहित्य पुरस्कार सारू परविश्टियां मांग़ी बीकानेर/ 'मुक्ति संस्था', बीकानेर गत पांच साल सूं हर साल 'राजस्थानी कथा साहित्य पुरस्कारां' री श्रंखला सुरू करी ही। 'मुक्ति संस्था' रा सचिव, कवि-कथाकार राजेन्द्र जोशी बतायो कै राजस्थानी भासा में राष्ट्रीय स्तर माथै 'पोकरमल राजरानी गोयल स्मृति राजस्थानी कथा साहित्य पुरस्कार'* हर साल राजस्थानी कथाकारां ने भेंट करया जावै है। जोशी बतायो कै ईं साल ईं दो राजस्थानी कथाकारां ने पुरस्कार दीया जावैला। पहलो पुरस्कार 'राजस्थानी कथा साहित्य सृजन'* अर दूजो 'राजस्थानी महिला कथा सृजन पुरस्कार' जो खाली महिलावां ने ईं दीयो जावैला। जोशी बतायो कै जणी दो साहित्यकारां रो चुनाव होवैला, उणां ने पुरस्कार रै मूजब ग्यारै-ग्यारै हजार रूप्या, शॉल, श्रीफल, यादगारी चीन्ह अर अभिनन्दन-पत्र भेंट करीया जावैला। वणां बतायो कै पुरस्कार बांटण रो काम पोकरमल राजरानी गोयल चैरिटेबल ट्रस्ट रै सौजन्य सूं होवैला। पोकरमल राजरानी गोयल ट्रस्ट रा अध्यक्ष डॉ. नरेश गोयल बतायो कै साल 2022 सूं 2024 रै बीच छप्योड़ी राजस्थानी कहाणी-संग्रह या उपन्यास री एक पोथी 31 जनवरी 2026 तांईं - 'राजेन्द्र जोशी, तपसी भवन नत्थूसर बास, ब्रह्म बगीचे रै पाछै, बीकानेर 334004'* रै पतै माथै खुद जायर'र या डाक सूं भेजी जा सकै है। पुरस्कार चुनण सारू बणायोड़ी कमेटी रो फैसलो आखिरी अर माननै जोग होवैला।

1- असिस्टेंट प्रोफेसर भर्ती परीक्षा सूं रोक हटी: राजस्थान हाईकोर्ट असिस्टेंट प्रोफेसर भर्ती परीक्षा 2025 माथै लागी रोक हटा दी है, अर RPSC (राजस्थान लोक सेवा आयोग) अब 7 सूं 20 दिसंबर तांई होवण वाळा ईं इम्तहांन सारू एडमिट कार्ड जारी कर दीया है। ईं सूं तैय्यारी करैण वाळा उमीदवारां ने बड्डी राहत मिली है। 2- किसान ने बड्डो तौफो – हांटा (गन्नै) रो दाम बढ्यो: मुख्यमंत्री भजनलाल शर्मा किसानां ने तौफो देवतो थका गन्ना रो समर्थन मूल्य (SAP) बढ़ावण रो ऐलान कियो है। 3 - अंतरराष्ट्रीय स्कॉलरशिप सूं राजस्थान री बेटी रो मान: राजस्थान री एक बेटी योगिता ने एक साथै दो अंतरराष्ट्रीय स्कॉलरशिप मिली है, जिण सूं प्रदेश रो नाम ऊंचो हुयो है। 4- गंग नहर रै 100 बरस पूरा होवण माथै सोगात: गंग नहर रै 100 बरस पूरा होवण माथै मुख्यमंत्री नहरी तंत्र सारू रु. 1717 करोड़ रा कामां री सोंगात दी है। 5- अलवर सहर में AI कैमरा लागैला: अलवर पुलिस सहर में बढ़ रह्या अपराध ने रोकण सारू 9 जग्यां माथै आर्टिफिशियल इंटेलिजेंस (AI) तकनीक वाळा कैमरा लगावैला। ईं सूं बदमाश री पैचाण होवैला अर चोरी या संदिग्घ गाड़्यां री जांणकारी तुरंत पुलिस ने मिल जावैला

शिवोहम योग केंद्र रा संचालक योगाचार्य प्रीतम सिंह चुंडावत जी लिखी किताब "शिवोहम योग साधना" रो विमोचन सिटी पैलेस शंभू निवास में डॉ. लक्ष्यराज सिंह मेवाड़ सा कर कमलां सूं घणा ही सम्मान री साथे करायो गयो। डॉ. लक्ष्यराज सिंह जी कह्यो कि आ किताब योग क्षेत्र में एक खासी काम री चीज़ है, खासकर नवा-नवा योग साधकां खातर तो बिलकुल नेमत बराबर है। ऊँणा कह्यो कि छोटी-सी किताब में योग रा लगाबगा सगळा महत्त्वपूर्ण ज्ञान ने आकर्षक चित्रां सूं, अने सरल-सी भाषा में समेट्यो है। किताब असी है कि एक वारी पढ़ो तो फेर कोई और ग्रंथ ने देखण री जरूरत नी पड़ै। डॉ. साहब कह्यो कि आ किताब “गागर में सागर” वाळी उक्ति ने अखेर साँचो कर देवे है। असी किताब तो हर योग प्रेमी पास होणीच चावे, क्योंकि अणी में योग रो सगलों सार समायलो पड्यो है।