आपाणो राजस्थान - समाचार

जयपुर | बायोलॉजिकल पार्क में बाघिन ‘रानी’ आपणा छह शावकां साथे नजर आई — ये दरसाव जंगलां में भी कम देखावै मिलै। ई शावक 27 अप्रैल ने एक साल रा होई जावेला। तीन मेल — सूर्य, शौर्य, विजय अर तीन फीमेल — वृंदा, अंबे अधिकारियां अनुसार शावकां पर लगातार नजर राखी जाइ री है।

आयड़ नदी अर संबंधित ढांचां खातर 41 करोड़ रुपया रो प्रावधान कीधो है। वर्तमान दो लेन रो पुल अब चार लेन में बदलेला। स्टेट हाईवे-32 स्थित अंडरब्रिज रो भी नवीनीकरण करायो जावेला।

जोधपुर | स्वच्छता सर्वेक्षण सूं पेला नगर निगम द्वारा वेस्ट टू वंडर थीम पे शहर रा 10-12 स्थानां माथे आकर्षक कलाकृतियां बणाई गी। लोड़ा, तार अर टाइल्स ज्या कबाड़ री रीयूज सूं बणी ई कलाकृतियां अब सेल्फी पॉइंट बणती जा री है। नगर निगम कार्यालय बारणे सूर्यनगरी अर ब्लू सिटी दर्शावती कलाकृति बणाई गी है। 8 आयरन बेस्ड अर 5 टाइल्स बेस्ड कलाकृतियां तैयार कीधी। मेहरानगढ़ पहचान, घंटाघर कन्नै हाथ अर बांसुरी, काजरी, पचेटिया हिल्स समेत कई स्थानां माथे इंस्टॉलेशन लगावेला। मोर अर दूजा जानवरां री आकृतियां भी शामिल है। अधिकारियां अनुसार कबाड़ रे रीयूज सूं उपयोगी अर सुंदर वस्तु बणावां सूं जागरूकता बढ़सी। ई-व्हीकल ने भी बढ़ावा शहर में 12 स्थानां पर ई-व्हीकल चार्जिंग स्टेशन बणावां रो काम चालू है।

जोधपुर | ओसियां कन्नै पड़ासला रोड पर गुरुवार सांझ चालती लोडिंग ऑटो रिक्शा में अचानक आग लाग गी, जिण सूं वाहन रो आगलो केबिन पूरो बळ'र राख व्ही ग्यो। गाड़ी में CNG किट लागी होवां कारण बड़ो हादसो होवां री आशंका ही, पण समय माथे आग पे काबू पा लैण सूं स्थिति नियंत्रित रह गी। फायर ब्रिगेड अर पुलिस टीम मौके पर पूगी अर तुरंत कार्रवाई करता आग पे काबू पायो गयो। पुलिस अनुसार शाम करीब चार बज्या लोडिंग ऑटो ओसियां री तरफ सूं आवतो हो, जद अचाणचक आग लाग गी अर आग आगे रो भाग चपेट में ले लियो। भाग्य री बात या री के गाड़ी में लाग्या 11 किलो सीएनजी टैंक ने कोई नुकसान कोनी पहुंच्यो। पुलिस बतावै है के समय पे कार्रवाई कोनी होवती तो बड़ो हादसो व्है सकतो हो। फिलहाल आग लागवां रा कारणां री जांच चाल री है।

पूजपुर | मोवाई गांव में रविवार ने विवाहित महिलावां वैवाहिक जीवन सुखमय बणावां अर कुंवारी कन्यावां सुशील वर री कामना खातर गणगौर पर्व भक्तिभाव सूं मनायो। सवेर कुंवारी कन्यावां हाथां में जल भर्यो कलश लेई मोहल्ला में प्रतिष्ठापित ईसर, पार्वती अर कानूड़ा री प्रतिमावां रो जागरण करावां गई। पाछे रंग-बिरंगा परिधान पहन के मंगल गीत गाती प्रतिमा स्थलां पर पूगी। इठै ईसर-पार्वती अर कानूड़ा री प्रतिमावां रो पूजन-अर्चना अर आरती कीधी। इ साथे व्रत रो समापन व्हीयो।

धंबोला | कस्बा में तीन दिवसीय सत्संग अर प्रवचन महोत्सव में कथावाचिका जगदीश्वरी देवी रा आगमन पर शोभाजात्रा निकाळी गी। प्रवचन दौरान ऊणां भक्ति रा चार भाव — माधुर्य, सखा, दास अर प्रजा भाव रो वर्णन कीधो। माधुर्य भाव में भक्त भगवान ने प्रियतम मानै है, सखा भाव में मित्र, दास भाव में सेवक अर प्रजा भाव में भगवान ने राजा मानै है। ऊणां कह्यो के मानसिक पूजा सर्वोपरि है अर वात्सल्य भाव सूं भगवान ने बाल रूप में स्मरण करनो आत्मा ने शांति देवेला। कार्यक्रम दौरान भगवान श्रीकृष्ण री बाल लीलावां रो सजीव चित्रण अर भजन-कीर्तन सूं श्रद्धालु भावविभोर व्ही गया। पांडाल में फूलां सूं ब्रज री होळी खेली गी।

पंजपुर | डिवाइन नेचर सेकंडरी स्कूल बड़ौदा में प्रतिभा खोज परीक्षा रो आयोजन व्हीयो। उप निरीक्षक चंद्रवीर सिंह, पल्लव जोशी, योगेश सुथार निरीक्षण करता विद्यार्थियां ने अनुशासन अर संस्कारां रो मार्गदर्शन दीधो। निदेशक फतेह सिंह बतायो के आसपास रा क्षेत्र सूं प्रतिभावां इंग्लिश अर हिंदी माध्यम में टॉप-टेन में आवां खातर प्रतियोगिता में भाग लियो। अतिथियां रो स्वागत मिश्री अर नीम री कोपलां सूं कीधो गयो। युवराज सिंह, करण सिंह, कपिल चौबीसा, सुनीता चौबीसा अर कुसुम त्रिवेदी अतिथियां रो अभिनंदन कीधो। प्रतियोगिता इंचार्ज नीलेश पाटीदार अर जितेंद्र सिंह पंवार विद्यार्थियां ने शुभकामनावां दीधी। इ जाणकारी मीडिया प्रभारी प्रियांश जोशी दीधी।

कथा वाचन करता श्याम महाराज कह्यो के भगवान आपणा सच्चा भक्तां ने जीवन रा सुख-दुख माध्यमां सूं मजबूत बनावै है। ऊणां उदाहरण दियो के ज्यूं बुलेटप्रूफ जैकेट मनुष्य ने बाहरी हमलां सूं बचावै है, त्यूं ईश्वर भक्त ने अंदर सूं मजबूत बणावै है। दूजा दिन शिव-पार्वती विवाह रो भावपूर्ण वर्णन कीधो, जिण सूं श्रद्धालु भावविभोर व्हैग्या। साथे भगवान कार्तिकेय द्वारा ताड़कासुर वध रो प्रसंग भी प्रस्तुत कीधो गयो। प्रवचन दौरान महाराज कह्यो के अत्यधिक प्रशंसा सूं अहंकार पैदा होवेला, जिको भक्ति मार्ग में बाधा बणै। ऊणां कह्यो के निष्काम भाव सूं कीधी भक्ति ही सच्ची भक्ति है। कार्यक्रम में दूजा दिन रा यजमान जयपाल सिंह चौहान रह्या। कथा रोज सवेर 7 सूं रात 10 बजे तक चालसी। इ अवसर माथै लक्ष्मण सिंह चौहान, करण सिंह चौहान, विक्रम सिंह चौहान, महिपाल सिंह चौहान, देवीलाल कलाल, गुणवंत कलाल, हमराज सिंह समेत अनेक श्रद्धालु मौजूद रह्या।

यजमान प्रकाश त्रिवेदी भगवान श्रीराम अर हनुमानजी रो पूजन कीधो। जितेंद्र सुधार गणपति अर बालमुकुंद भट्ट सरस्वती वंदना कीधी। भरत भट्ट हनुमानजी रो आह्वान कीधो। नरेंद्र सोमपुरा बतायो के मंडल री ओर सूं ललित मिस्त्री यजमान परिवार रो स्वागत कीधो। उपस्थित श्रद्धालुवां सामूहिक राष्ट्रगान कीधो। प्रीतम पंचाल अर नरेश भट्ट ‘शिवलहरी’ सुंदरकांड री चौपाइयां रो गायन कीधो। भजन संध्या में मंडल अध्यक्ष किशोर भावसार “मन लागो मेरो यार फकीरी में”, चेतन गोगरोत “जनम सफल होगा रे बंदे”, जितेंद्र कलाल “जगन्नाथ चक्र नैन नीलांचल वारे”, नकुल गोगारोत “मन वाणी में वो शक्ति कहां” अर राहुल भगत “आदमी मुसाफिर है” ज्या भजन प्रस्तुत कीधा। रुद्र, नीरज अर प्रणय सोनी ढोलक, डैनी ऑर्गन, जिग्नेश रावल ऑक्टोपैड अर कर्मवीर सिंह राठौड़, उत्तम पंचाल, प्रांशु भट्ट, कमलेश रावल अर धार्मिक पंचाल बीजा वाद्ययंत्रां पर संगत दीधी। हनुमान चालीसा रो पाठ नरेश भट्ट ‘शिवलहरी’ द्वारा कीधो। यजमान त्रिवेदी आभार व्यक्त करता मंडल री सराहना करी अर सत्संग ने ज्ञान अर भक्ति रो स्रोत बतायो। इ अवसर माथै निर्भयशंकर मेहता, देवीलाल दर्जी, रितेश गामोट, मानशंकर, राकेश व्यास, दिलीप मेहता, देवीलाल फलोत, धनेश्वर, विशाल, उमाशंकर भट्ट, विनोद, रामचंद्र, अरविंद, कमलेश भट्ट अर सुभाष फलोत मौजूद रह्या।

उदयपुर | विश्व महिला दिवस अवसर माथे ओसवाल सभा अर आचार्य तुलसी डायग्नोस्टिक सेंटर द्वारा महिला स्वास्थ्य जागरूकता अभियान शुरू कीधो। इण अंतर्गत 8 सूं 14 मार्च तक विशेष स्वास्थ्य जांच शिविर चेतक सर्किल स्थित माधव चैंबर्स में चालसी। शिविर सवेर 7:30 सूं 10:30 बजे तक चालसी। शिविर में महिलाओं खातर सीबीसी, थायराइड प्रोफाइल, सीरम आयरन, लिपिड प्रोफाइल, फास्टिंग ब्लड शुगर, सीरम कैल्शियम अर विटामिन B-12 जांच 499 रुपया में उपलब्ध रहसी। जांच पाछे डॉ. विजय कुमार पुरोहित निशुल्क परामर्श देवेला। दंत जांच डॉ. अभिजीत सेठिया अर डॉ. रीतिका बघेला करसी।