आपाणो राजस्थान - समाचार

डूंगरपुर | माणक चौक स्थित श्री आदिनाथ भगवान जिनालय में शनिवार पौष पूनम माथै सकल जैन श्वेतांबर श्री संघ रा तत्वावधान में आचार्य देवेश हेमचंदसूरीश्वर महाराज रो 91वां जन्मदिवस श्रद्धा अर भक्ति सूं मनायो गयो। इण अवसर माथे लाभार्थी परिवार सुलोचना बाबूलाल सरैया परिवार द्वारा भक्तामर पाठ रो आयोजन कियो गयो। इणमें प्रभु रो प्रक्षाल, केसर पूजा अर आरती करी गी। अंत में समूह स्नात्र महोत्सव पूजा रो आयोजन व्हीयो। इण पावन धार्मिक आयोजन सूं सकल श्री संघ द्वारा गुरुदेव रे प्रति श्रद्धा अर्पित करी गई। कार्यक्रम में वेला भाई पुजारी, सुबोध सरैया, अभय कोठारी, धर्मेश मलासिया, रोहित सरैया, भाविक सरैया, मनीष दावड़ा, अनूप सरैया, राजेश जैन, विवेक दोशी, विरल कोठारी, ममता कोठारी, सुलोचना सरैया, श्वेता सरैया, अंकिता सरैया, ऋचा दोशी, ममता सरैया, शीला दोशी समेत अनेक महिला अर पुरुष श्रद्धालु मौजूद रह्या।

पौष पूनम माथै शनिवार सवेर साबला हरि मंदिर सूं बेणेश्वर धाम तक महंत अच्युतानंद महाराज रा सान्निध्य में 5 किलोमीटर री पदजात्रा निकाळी गी ही। पदजात्रा में राजस्थान समेत मध्य प्रदेश, गुजरात अर बीजा राज्यां सूं आया हजारां मावभक्त शामिल रह्या। बेणेश्वर धाम पर धर्मसभा में महंत धर्म रा मार्गां पे चालवां, देश रा विकास अर भलाई रे वास्ते एकता अर भाईचारा बणाया राखवां रो आह्वान कीधो।

उदयपुर। डॉ. दौलतसिंह कोठारी शोध अर शिक्षण संस्थान अर विज्ञान समिति रा साझे मां गोगुंदा क्षेत्र रा गांव भारोड़ी मां स्थित राजकीय उच्च प्राथमिक विद्यालय मां गणित अर विज्ञान गुरुजनां रो तीन दिवसीय प्रशिक्षण कार्यक्रम आयोजित कियो गयो। आयोजन मां आसपास रा स्कूलां रा गुरुजन अर घणा बच्चा उपस्थित रह्या अर प्रशिक्षण मां भाग लियो। कार्यक्रम रो मुख्य उद्देश्य बच्चां मां वैज्ञानिक सोच विकसित करनो हो। इण मां बतायो गयो कि घरां मां उपलब्ध साधारण वस्तुआं ज्यूं थाली, गिलास, प्रेशर कुकर, कैंची, तवा, नमक अर पाणी रो उपयोग कर बिना खर्चे बच्चां नै विज्ञान समझायो जा सके। इसरो सूं सेवानिवृत्त वैज्ञानिक डॉ. सुरेंद्रसिंह पोखरना STEM (विज्ञान, तकनीक, इंजीनियरिंग अर गणित) आधारित गतिविध्यां रा जरिए रोजमर्रा री चीजां मां छुप्यो विज्ञान समझावां पर जोर दियो। भाभा परमाणु ऊर्जा विभाग सूं सेवानिवृत्त वैज्ञानिक डॉ. महावीर प्रसाद जैन इंजीनियरिंग रा उपयोग अर महत्व रा बारे मां जानकारी दी। अलर्ट संस्था रा अध्यक्ष जितेंद्र मेहता पर्यावरण संरक्षण अर जलवायु परिवर्तन बाबत बच्चां नै स्कूल स्तर सूं जागरूक करां री जरूरत बताई। समग्र शिक्षा अभियान, गोगुंदा री मुख्य ब्लॉक शिक्षा अधिकारी प्रेरणा नौसियाल अतिथ्यां रो स्वागत अर आभार व्यक्त कियो।

उदयपुर। उदयपुर टेल्स इंटरनेशनल स्टोरी टेलिंग फेस्टिवल रै तहत छठो वार्षिक स्टोरी टेलिंग प्रतियोगिता विद्या भवन स्कूल मां आयोजित हुई। स्कूली बच्चां कहाणियां रो ऐसो रंग बिखेर्यो कि हर प्रस्तुति दर्शकां नै मोहित कर दियो। मां माय एंकर फाउंडेशन री ओर सूं आयोजित इण प्रतियोगिता मां बच्चां मेवाड़ री बहादुरी सूं जुड़ी लोककथां अर शेक्सपियर रा नाटकां सूं प्रेरित कहाणियां सुणाईं। घणी प्रस्तुत्यां मां ईमानदारी, दया, साहस अर सहानुभूति जस्‍या जीवन मूल्य उजागर कियां। कई बच्चां रामायण अर महाभारत रा अंशां नै भावपूर्ण अंदाज मां प्रॉप्स अर कॉस्ट्यूम रा साथै मंच पर जीवंत कियो। रोजमर्रा जिंदगी सूं जुड़ी कहाणियां भी प्रस्तुत हुईं, जां मां किसानां, पशुआं अर प्रकृति सूं जुड़़या गहरा जीवन संदेश समायो। प्रतियोगिता मां विद्या भवन स्कूल, सेंट एंथोनी सीनियर सेकेंडरी स्कूल, दिल्ली पब्लिक स्कूल, द जूनियर स्टडी, द सीनियर स्टडी, सैफी स्कूल, नीरजा मोदी स्कूल अर महाराणा मेवाड़ विद्या मंदिर रा विद्यार्थी शामिल रह्या।

देश रा घणा इलाक्यां मां सर्दी घणी पड़ री है। घणा लोगां कने ठंड सूं बचाव रा साधन नीं है। आपरी थोड़ी-सी मदद उनां खातर घणी बड़ी राहत बन सके। आओ, आप अर मा मिलर पहनण योग्य कपड़ा दान कर जरूरतमंदां री जिंदगी मां राहत लावां। दैनिक भास्कर हर साल इण उद्देश्य सूं वस्त्रदान अभियान चलावै। इण मां एकत्रित कपड़ां री धुलाई, इस्त्री अर पैकिंग कर उणा नै जरूरतमंदां कने पहुंचायो जावै, जणां सूं वणा नै ठंड सूं राहत अर सम्मानजनक जीवन रो अहसास मिलै।

डिगरना गांव रा निशाणेबाज भाग्यवर्धन सिंह जोधा एक बार फेर राष्ट्रीय स्तर पर जिले रो नाम रोशन कियो है। नेशनल राइफल एसोसिएशन ऑफ इंडिया री ओर सूं आयोजित 68वीं नेशनल राइफल शूटिंग चैंपियनशिप भोपाल (मध्यप्रदेश) मां हुई, जां मां भाग्यवर्धन सिंह सीनियर वर्ग मां शानदार प्रदर्शन कर इंडिया टीम ट्रायल खातर चयनित हुया। भाग्यवर्धन इणसूं पहल्यां भी राष्ट्रीय स्तर पर सफलता प्राप्त कर चूक्यो है। पिता वरुण सिंह राजपूत बतायो कि बचपन सूं ही उणरो झुकाव निशाणेबाजी री ओर रह्यो है अर विद्यालय स्तर री प्रतियोगित्यां मां भी नियमित भाग लेतो रह्यो है।

बीकानेर। टैगोर मेमोरियल चिल्ड्रन सीनियर सेकेंडरी स्कूल मां शुक्रवार नै रविंद्र रंगमंच पर वार्षिक समारोह ‘उमंग-2025’ आयोजित कियो गयो। इण साल समारोह री थीम ‘सेलिब्रेटिंग ग्रोथ एंड ट्रांसफॉर्मेशन’ रही। कार्यक्रम मां ऑपरेशन सिंदूर, मणिकर्णिका, पानीदार, भगत सिंह अर टीपू सुल्तान पर आधारित सांस्कृतिक प्रस्तुत्यां दी गईं। मुख्य अतिथि ममता सारस्वत अर विशिष्ट अतिथि दीपक त्यागी, डॉ. अबरार पंवार अर एन.वी. श्रीनिवास रह्या। समारोह दौरान मेधावी अर जरूरतमंद विद्यार्थ्यां नै सम्मानित कियो गयो। बोर्ड परीक्षा मां 90 प्रतिशत सूं अधिक अंक लावण वाळा 7 विद्यार्थ्यां नै लैपटॉप, 85 प्रतिशत सूं अधिक अंक लावण वाळा 9 विद्यार्थ्यां नै मोबाइल अर 80 प्रतिशत सूं अधिक अंक लावण वाळा 7 विद्यार्थ्यां नै 11 हजार रुपये रो चेक दियो गयो। विद्यालय निदेशक माफूद अली कादरी अर प्रधानाचार्या पिंकी स्वामी अतिथ्यां रो स्वागत कियो।

चूरू| चूरू जिले रा रतननगर कस्बा री निकिता मीणा राजस्थान न्यायिक सेवा (RJS) परीक्षा मां प्रदेश मां 27वीं रैंक प्राप्त करी है। निकिता वर्तमान मां राजकीय लॉ कॉलेज मां एलएलएम द्वितीय वर्ष री छात्रा है। निकिता बतायो कि वणी आरजेएस री तैयारी बिना कोचिंग करी। न्यायिक अधिकारी पारुल जैन अर लॉ कॉलेज रा प्राचार्य डॉ. एस.के. सैनी सूं मार्गदर्शन मिल्यो। स्वयं अध्ययन रा दम पर सफलता प्राप्त करी। निकिता 24 वर्ष री है। उणरो भाई भी लॉ कॉलेज मां पढ़ै है अर बड़ी बहन पूजा रो हाल ही मां सहायक आचार्य पद पर चयन हो चूक्यो है। लॉ कॉलेज रा प्राचार्य डॉ. सैनी बतायो कि कॉलेज सूं अब तक 45 विद्यार्थी आरजेएस बण चूक्या हैं।

गंगरोप। रैगर समाज री ओर सूं भवई नृत्य री सैकड़ां साल पुराणी परंपरा नै जीवंत राखवां खातर सांस्कृतिक आयोजन कियो गयो। कार्यक्रम बाबा रामदेव मंदिर परिसर मां आयोजित हुआ। मध्यप्रदेश सूं आयी मोहनलाल एंड कंपनी री टीम मां कलाकार प्रकाश रावल, हरिराम, मांगीलाल दौलतपुरा, हितेश चित्तौड़गढ़, गोरूलाल अर भैरूलाल झालावाड़ क्षेत्रीय भाषा मां नाट्य प्रस्तुत्यां दीं। कॉमेडियन मुकेश रावल दर्शकां नै खूब हंसाया। आयोजन मंडली रा प्रमुख मोहनलाल बतायो कि भवई नाट्य मंचन री परंपरा उणा री नौवीं पीढ़ी निभा री है, जो करीब 450 साल सूं चली आवै। सत्यवान-सावित्री रो जीवंत मंचन विशेष आकर्षण रह्यो।

रायळा। बेणेश्वर धाम पर ट्राइबल एम्प्लाइज फेडरेशन राजस्थान रो प्रदेश स्तरीय शैक्षिक अधिवेशन शुक्रवार नै आयोजित हुयो। सम्मेलन मां स्कूल प्रबंधन, शिक्षा नियम अर शैक्षिक नवाचारां पर विस्तार सूं चर्चा हुई। प्रदेश, जिला अर ब्लॉक स्तर रा पदाधिकार्यां रो सम्मान कियो गयो। वक्‍ता प्रारंभिक शिक्षा, जैविक खेती, गैर-शैक्षिक कार्यां सूं राहत, रोस्टर-आरक्षण री पालना अर स्थानांतरण जस्‍या मुद्दा पर विचार रख्या। कार्यक्रम रो संचालन नानालाल पारणी अर सुरेंद्र वहात कियो अर आभार जिला उपाध्यक्ष डॉ. नानूलाल डामोर व्यक्त कियो।