| (क-घ)
क
कड़
कड़ मांय मारतां ई लात
बै सावल करण लागग्या बात।
करड़ा क़दम
जद सरकार मांय
कोनी दम
तो बा कियां उठाबै
करड़ा क़दम।
क़सूर
म्हे कर्यो मोटा क़सूर
कर'र आल इंडिया टूर
बछै होटल आलां
पाड़ लिया म्हारा पूर।
कढी बिगाड़
चालता' ई
कर लेवै राड़
कढी बिगाड़।
कसर-1
सगलो देस
म्हारो घर है
बस रजिस्ट्री
कराण री कसर है।
कन्डक्टरी
सैंस्यूं सोखो काम
कन्डक्टरी
रिपिया सूं हरदम
जेब रै' वै भरी।
कहा सुणी
सारी रात रामायण सुणी
घरां आंता ही घरआली स्यूं
कोनी बणी।
कचैड़ी
मचा राखी है लूट
अठै सगला बोलै झूठ।
कंजूस-1
बो इत्तो कंजूस
चला लेवै काम
सूंघ' र जूस।
कंजूस-2
कियां ठीक हुवै कड़
जद बो राखै पईसै नै
दांतांस्यूं पकड़।
कमी
बै दूजां मांय काढै कमी
आप खेलै सगलै दिन रमी।
कमज़ोर
छौरे मैं घणो ही जोर
पर हिसाब किताब मैं कमज़ोर।
कवि-1
कवि पै' ली खावै पान
अर पछै लोगां रा कान।
कवि-2
बां सुणाई जोरदार कविता
बै कवि हा बड़ा
सुण' र उतरग्या
भींता रा लेवड़ा।
करड़ावण
घरे कोनी
मांचा रै दावण
बो करै
दुनिया भर री करड़ावण।
क़सर-2
छोरै मैं कोनी
कोई कसर
कीं कहद्यौ
हुवै कोनी असर।
कर सकै
आदमी जिको चावै कर सकै
कीं नीं हुवै तो
जैर खा' र मर सकै।
कान खांडो
नेताजी रो
कुण कर सकै कान खांडो
बारै आंगै-लारै कमांडो।
काणी कोजी
नोटांस्यूं भरी हुवै
जकै री गो'जी
बीं री ब्याईज ज्यावै
काणी-को'जी।
कालो रीट
टींगर कालो रींट
दायजै मैं मांगै
सोनै री ईंट।
काम-1
जिका मरै है
बेकारां स्यूं तो आच्छा है
कीं तो करै।
काम-2
बां सगली उमर
कर्यौ एक ही काम
भर दियो घर
जाम-जाम।
काठो
बो राखै हाथ काठो
मारै कोनी गण्डक रै ई भाटो।
क़िसमत
बै घरे बैठ्या
आराम करै
बांगी क़िसमत
काम करै।
कीड़ीनगरौ
के हाल हुसी
इण जग रो जण बदर्यौ है
जाणै कीड़ीनगरौ।
क़ीमत
पाना कोनी आठ
किताब री कीमत साठ।
कीमतां
कीमतां री
डाढी तेज है रफ्तार
दिन मैं दो, तो
रात नै च्यार।
कुंआरो
ब्याह स्यूं पै' लां ई
छोरो हुग्यो न्यारो
बांरो आंगणो
रै' ग्यो कुंआरो।
कुंवारी
बा परणयौड़ी हो'र भी
कुंवारी है
घर आलैस्यूं न्यारी है।
कुण रोकै
बै है घर रा धणी
बा' नै कुण रोकै
चा' रै सागै
अमल री डली ठोकै।
कुड़को
बूढ़ियो चोरां रो है
कुड़को
जागजावै होतां ईं
थोड़ो सो खुड़को।
कूड़
जद सगलां ही बोलै कूड़
तो कुण गेरै कीं रै ई
सिर मांय धूड़।
कूटै
जको बतलांवतां' ई
सात जग्यासूं टूटै
बीं नै कुण कूटै।
केस-1
दुनिया री 'रेस'
पाड़ै है सगला
एक दूजै रा केस।
केस-2
बै बण्या भिरै है महात्मा
राखै लाम्बा-लाम्बा केस
कचैड़ी मैं चालै बां पर
बलात्कार रो केस।
केस-3
किया पड़सी पेस
जकां नै सूंप्यो देस
बां पर ई चालै केस।
के करै-1
बां रो कुण के करै
जका लाडू खायां मरै।
के करै-2
बां रो के करै रब
जका दफ्तर रै' वै
चौबीसूं घंटा गायब।
कैह्णौ
जे थे चावो
घर मैं सुख स्यूं रैहणो
तो मानो घरआली रो कैह्णो।
कोड
होडा-होड
गांव रै छोरे-छोरियां नै
स्प्रे पी' ण रो चढर्यौ है कोड।
खरी-खोटी
कबीरजी गणी सुणाई
लोगां नै खरी-खोटी
कण ही पटी कोनी बां री चोटी।
ख
ख़सम
इसै ख़सम रो
कोई के करै
जको बात-बात पर
बटका भरै।
ख़राब नीत
दफ्तर आला री है
खराब नीत
करै कोनी बात ही सींत।
ख़त
बूढियै लिख्यौ
भगवान नै ख़त
चक ले!
क्यूं करै दुर्गत।
खसै
जकी चालती
भींता सूं खसै
बां कीं ओर रै ही बसै।
खावै
दो भाई
एक चालै जीवणै
दूजो चालै डावै
तो बां रो धन
लोग ही खावै।
खादी
छोड़तां ई खादी
नेताजी री कमाई
हुगी आधी।
ख़ाली पर्स
बै रह आया अमरीका में
तीस बरस
जद खरे आया
ख़ाली हो पर्स।
खा सूं
तीन फूट री सासू
छः फुटरी बहू नै कै'वे
तनै खा सूं।
खारक
गधा खारक खावै
म्हारै सूं ओ
देख्यौ कोनी जावै।
खारो पाणी
भगवान मैं भी
कीं कोनी आणी-जाणी
कित्तौ मोटो समन्दर
खारो पाणी।
ख़ास
मरीज़ मैं सांस कोनी
डाक्टर साहब बोल्या,
आ बीमारी तो कोई ख़ास कोनी।
खेल
सरकार खेलै खेल
मिनटां मांय
ग़ायब कर देवै तेल।
खोटो लक्खण
छोरे मैं कोनी
एक भी खोटो लक्खण
बाप कै' वै उतराद
तो बो जावै दक्खण।
खोटी बात
बात है खोटी बूढियो साठ बरस रो होग्यो
अजै ही मांगै रोटी।
खोटी आदत
टींगरा नै पड़गी
आदत खोटी
उठतां' ई मांगै रोटी।
खोट
मिलतां' ई नोट
छोरी रा खतम हुग्या खोट।
ग
गवाह
झूठा गवाह
वाह ! वाह !
गन्द
बै आदमी है गन्द
बानै कोनी मज़ाक पसन्द।
'गन'
कंजूस कन्नै सूं बै ही
ले सकै धन
जकां कन्नै हुवै गन।
ग़जब रो सीन
आंधियो गयो
पिक्वर देखण
देख्यौ गज़ब रो सीन
एक बीनणी लारै दसके बीन।
गप-1
बां सगली उमर
लगाई गप ही गप
मर्या जद ही
हुया चुप।
गप-2
सुणो भाई
एक चोटी सी गप
कालेज रा छोरा करै
राम नाम रो जप।
गप-3
घरे टापली चौवे टप-टप
बौ गुवाड़ बैठ्यो मारै गप।
गप-4
बीनै कुण कै' वै गप
जकी अख़बार मैं गई छप।
ग़रीब रो गाभो
ग़रीब रो गाभो
धरती अर आभो।
ग़म
बानै खाग्यो
एक ही ग़म
क्यूं हुगी लोगां री
सहनसक्ति कम।
गर्र-फर्र
कठै पड्या है
प्रहलाद जिस्या टाबर
अब तो पेट मैं ही
करणलाग जावै गर्र-फर्र।
गणित
बै है एम.ए.
'इन' गणित
फेर भी जाम राख्या है
अणगिणत।
गाल
नैड़ै आग्यो मरतगाल
तो भी छोड़ी कोनी गाल।
गुणी
आदमी गुण
सगलां सागै दुसमणी।
गुण्डागर्दी
कुण कै' वै
ई नै गुण्डागर्दी
बै तो लूटै सरे आम
पै'र खाकी वर्दी।
गुस्सौ
जका बात-बात पर बलै
बै कियां फूले-फलै।
गोगोपीर
सैंस्यूं आछो वीर
गोगोपीर
मिलै सेई अर खीर।
गोठ
दींनै कुण कोनी
देवै गोठ
जकी रा है
पतला-पतला होठ।
गोडै-गोडै
टींगर है गोडै-गोडै
पण बीनणी बीं रो
लारो कोनीछोडै।
गोर
चोर नै पकड़ै चोर
थे ना करियो
मेरी बात पर गोर।
घ
घणखाऊ
ज़को घणो छावै
बीनै जीमणनै
कुण बुलावै।
घासलेट
बहू बली लेट
खरे कोनी हो घासलेट।
घाटो
सरकार मंहगो कर दियो आट
दिखा-दिखा' रै बजट मैं घाटो।
|
ए ऐ ओ औ अं अ:
